ناصر بلوچ: تعليمدان ۽ ليکڪ ناصر علي ولد حسن علي ڪھيري بلوچ پھرين ڊسمبر 1950ع تي تلھار ضلع بدين ۾ جنم ورتو. 1967ع۾ ڊي. سي هاءِ اسڪول تلھار مان مئٽرڪ، 1969ع ۾ گورنمينٽ ڪاليج حيدرآباد مان انٽر ۽ 1976ع ۾ سنڌ يونيورسٽي مان انٽرنيشنل رليشنز شعبي ۾ ماسٽرس ڪئي. 1970ع کان هن لکڻ جو آغاز ڪيو. سندس لکڻيون ۽ ڪالم سنڌ ٽائمز، عبرت، مھراڻ، خادم وطن، هلال پاڪستان، عبرت، ڪاوش، سنڌ ايڪسپريس، سوڀ، برسات، عبرت مئگزين، هزار داستان، پيغام احمد، گلشن لاڙ، لوڪ ۽ همسري کان علاوه مختلف اخبارن، رسالن ۽ ڪتابن ۾ شايع ٿيا آهن. ناصر بلوچ سنڌي ادبي سنگت، سنڌ گريجوئيٽس ايسوسيئيشن سان وابسته آهي ۽ ڊاڪٽر ظفر حسين ميموريل سوسائٽي تلھار جو صدر آهي. هن عملي زندگي جي شروعات باواني شگر مل تلھار ۾ ملازمت سان ڪئي، بعد ۾ اسٽيٽ بئنڪ حيدرآباد مان آفيسر گريڊ 11 طور رٽائر ڪيو. سندس ڇپيل ڪتابن ۾ ‘تلھار تاريخ جي آئيني ۾’ (ٻه جلد: 2014ع ۽ 2015ع)، ‘سھڻا سخن’ (2014ع)، ‘مختلف اخبارن ۽ رسالن ۾ ڇپيل مضمون ۽ ڪالمن تي مشتمل ڪتاب ‘ڪو آهي جيڪو سچ چوي’، 2016ع پنھنجي آتم ڪٿا ‘جا گذري سا گذري’ 2018ع، ڪلياڻ آڏاوڻي جي رسالي تان کنيل شاھه عبداللطيف ڀٽائي جي سوانح ‘آهين تون ئي تون’ (لطيفيات، ٽي شمارا)،‘تو هي تو’ (اردو ۾ شاهه لطيف جو سوانح)، ‘سوانح سچل سرمست’ (اردو)، ‘ڄاڻ موتين کاڻ’ (ڇھه شمارا) ۽ ٻاراڻو ادب (ٽي جلد)، ‘ناياب نسخا’، ‘ڏاهپ جا ڏس’، ‘گڏيل سوانح شاهه و سچل’ ۽ 2024ع ۾ آتم ڪٿا ڀاڱو ٻيو ‘خواب آهي زندگي ’ شامل آهن.
ناصر بلوچ اڄڪلھه تلھار ضلع بدين ۾ پنهنجي قائم ڪيل سنڌ گرامر اسڪول تلھار جو باني ۽ پرنسپال آهي.
1950.12.01 عيسوي
تعليمدان ۽ ليکڪ ناصر علي ولد حسن علي ڪھيري بلوچ پھرين ڊسمبر 1950ع تي تلھار ضلع بدين ۾ جنم ورتو.